തിരുവനന്തപുരം : സഹകരണ മന്ത്രിയായിരുന്ന കടകംപള്ളി സുരേന്ദ്രൻ എംഎൽഎ എഴുതിയ ‘കേരള സമ്പദ്‌വ്യവസ്ഥയും സഹകരണ മേഖലയും – സാർഥകമായ അഞ്ചു സഹകരണ വർഷങ്ങൾ 2016-2021′ എന്ന പുസ്തകം മുഖ്യമന്ത്രി പിണറായി വിജയൻ പ്രകാശനം ചെയ്തു.
നിയമസഭാ കോൺഫറൻസ് ഹാളിൽ നടന്ന ചടങ്ങിൽ സഹകരണ മന്ത്രി വി എൻ വാസവൻ ആദ്യപ്രതി ഏറ്റുവാങ്ങി. രാജ്യത്ത്‌ വളർന്നുവരുന്ന സാമ്പത്തിക അസമത്വങ്ങളുടെയും ചൂഷണാധിഷ്ഠിത സാമ്പത്തിക സാമൂഹ്യ നിയമങ്ങളുടെയും നടുവിൽ കേരളത്തിലെ സഹകരണ മേഖല നടത്തുന്ന വിജയകരമായ ജൈത്രയാത്ര പുസ്തകം വ്യക്തമായി വിശദീകരിക്കുന്നുണ്ടെന്ന് മന്ത്രി വി എൻ വാസവൻ പറഞ്ഞു.
വി ജോയി എംഎൽഎ, ആനത്തലവട്ടം ആനന്ദൻ, സഹകരണ സെക്രട്ടറി മിനി ആന്റണി, സഹകരണ രജിസ്ട്രാർ പി ബി നൂഹ്, സാഹിത്യ പ്രവർത്തക സഹകരണ സംഘം സെക്രട്ടറി അജിത് കെ ശ്രീധർ എന്നിവർ സംസാരിച്ചു. കടകംപള്ളി സുരേന്ദ്രൻ നന്ദി പറഞ്ഞു. സഹകരണ മന്ത്രിയെന്ന നിലയിലുള്ള അനുഭവങ്ങളുടെ അടിസ്ഥാനത്തിൽ എഴുതിയ ലേഖനങ്ങളുടെ സമാഹാരമാണു പുസ്തകം. സാഹിത്യ പ്രവർത്തക സഹകരണ സംഘമാണ്‌ പ്രസാധകർ.