നഗരത്തിന്റെ ഓണാഘോഷത്തിന് പൊലിമയേകാൻ മാനവീയംവീഥി നിർമാണം വേഗത്തിലാക്കി. നടപ്പാത നിർമാണം, ടാറിങ്, കുടിവെള്ള പൈപ്പ് സ്ഥാപിക്കൽ എന്നീ പണികളാണ് തീരാനുള്ളത്. മഴയില്ലാത്തതിനാൽ ടാറിങ് ജോലികൾ വേഗത്തിൽ തീർക്കാനാകുമെന്നാണ് പ്രതീക്ഷ. ഇതിനൊപ്പം നടപ്പാതയിൽ കല്ലുകൾ പാകും. പൈപ്പ് സ്ഥാപിക്കൽ, വൈദ്യുതി കേബിളുകൾ ഭൂമിക്കടിയിലൂടെ ആക്കൽ തുടങ്ങിയ പ്രവൃത്തികൾ രാത്രിയും സജീവമാണ്.
ഓണത്തിനുമുമ്പ് സ്മാർട് റോഡ് നിർമാണം പൂർത്തീകരിച്ച് ഗതാഗത യോഗ്യമാക്കുകയാണ് കോർപറേഷന്റെ സ്മാർട്സിറ്റിയുടെ ലക്ഷ്യം. കേരള റോഡ് ഫണ്ട് ബോർഡിനാണ് നിർമാണ ചുമതല. നഗരത്തിലെ വിവിധ റോഡുകളുടെ നിലവാരം ഉയർത്തി സ്മാർ‌ട്ട് റോഡാക്കുന്ന പദ്ധതിയുടെ ഭാഗമായി രണ്ടുവർഷം മുമ്പാണ് മാനവീയം വീഥിയിൽ നിർമാണം ആരംഭിച്ചത്. മ്യൂസിയം – വെള്ളയമ്പലം റോഡിനെയും ആൽത്തറ – വഴുതക്കാട് റോഡിനെയും ബന്ധിപ്പിക്കുന്ന മാനവീയത്തെ പൂർണമായും നഗരത്തിന്റെ സാംസ്കാരിക ഇടനാഴിയാക്കി മാറ്റുകയാണ് ലക്ഷ്യം.
കാൽനടയാത്രികർക്ക് പ്രധാന്യം നൽകിയാണ് നിർമാണം. ചെറിയ വാഹനങ്ങൾക്കുള്ള ഗതാഗത സൗകര്യവും പഴയതുപോലെ തുടരും. സാംസ്കാരിക പരിപാടികൾ സംഘടിപ്പിക്കാൻ കഴിയുംവിധം തുറന്നവേദിയും ഒരുക്കിയിട്ടുണ്ട്. റോഡിന്റെ വശങ്ങളിൽ ഇരിപ്പിടവും ലൈബ്രറിയും കുടിവെള്ള സൗകര്യവും ഒരുക്കും. കൂടാതെ ഒരേമാതൃകയിലുള്ള കടകളും സജ്ജമാക്കും. ഓപ്പൺ ജിം, ലിംഗസൗഹാർദ ശുചിമുറി, സൈക്കിൾ പാർക്കിങ് ഏരിയ എന്നിവയും ക്രമീകരിക്കും.
Comments